مش من هنا بعد عشريييييييييييين سنة..............؟

هل الانسان من حقه انه يقرر انه يبقى مش من هنا بعد عشرين سنه .
اوضح كلامى اكتر هل من حق الست او بمعنى ادق الزوجة تقرر بعد عشرين سنة جواز انها تكون مش من هنا.
تصحى الصبح تقول انا من حقى مانساش اللى فات ، من حقى انى مكملش بنفس القدر من التضحية،من حقى انى مكملش بعد عشرين سنة بنفس الطريقة ،مش معنى انى صبرت طول الوقت ده انى اكمل صبر اللى باقى من حياتى.
ايوه انا مش عايزة أطلق لأنى مقدرش لا أواجه المجتمع ولا وأولادى بحاجة زى دى ، كمان عشان ما حطمش الصوره اللى حاولت احافظ عليها طول عشرين سنة.
ايوه هى فعلا مجرد صورة .. مجرد صورة لبيت محترم مكون من أب وأم وأولاد مهذبين ومتفوقين ، وبكده تبقى اكتملت الصورة ،الصورة اللى المجتمع عايز يشوفها واللى هو نفسه عارف انه بيضحك على نفسه بيها ،واللى هو عارف انها ممكن تكون بس غلاف لحاجة هى فعلا فاسدة من جواها.
وفى نفس الوقت اللى انا عايزة احافظ فيه على صوره اسرتى وكمان على صورتى اللى مش عايزاها تظهر قدام الناس انى فشلت فى علاقه قدرت على الاقل قدامهم انجحها لطول عشرين سنة...
فى نفس الوقت ده مش قادرة أكمل ، ايوه مش قادره أكمل ،مش من حقى اصحى من النوم اقدم فاتوره عشرين سنة ، مش من حقى انى اطلب منه يدفع حساب متأخر عليه عشرين سنه، مش من حقى أقوله........... استنى على فكره انا ماقدرتش انسى اللى فات.
ما قدرتش انسى انك هنتنى كتير ، ماقدرتش انسى لحظات كنت بتكسرنى فيها، ماقدرتش انسى لحظات شوفت نظرة الناس ليه وهى يا شمتانة فيه ،يا شفقانة عليه، يا عايزة تقولى صوتكو كان عالى ليه امبارح.....
ايوه ،ايوه ما قدرتش انسى كل الناس اللى اشتركوا طول سنين فى مصالحتنا او اقصد فى خناقاتنا ، ايوه ده من سنين بس ماقدرتش انساه.
ايوه ماقدرتش انسى ان كل مرة كنت بتهينى سواء كان ذنبى او مش ذنبى كنت بتكسر جوايا حاجة منك حاجة ما كنتش أصلا قوية أوى عشان تستحمل كل ده... ايوه كانت بتتكسر يوم ورا يوم لحد ما عدش فاضل منها حاجة.........
ماعدش لك رصيد عندى يغطيك ، ده أصلا خلصان من زمان بس أنا كنت بديك فرصة طول عشرين سنة للسداد،،،، ودلوقتى بعد ما بدأت افكر بطريقة المكسب والخسارة لقيتنى خسرت كتير وكتير أوى ..
حاسه انه كفاية خسارة لحد كده........ وبرغم انك فعلا وبعد عشرين سنه من الديون راجع بتصلح حساباتك ،راجع بتحاول تبنى طريق بينا ، راجع بتبدأ مشوار انت نهيته من عشرين سنه..................
ايوه بتحاول وعشان الحق فعلا غيرت فى نفسك فعلا بتحاول وتحاول.
طيب وأنا يا ترى مفروض عليا انى انسى، وكأن كل اللى فات ما كنش ويا ترى أصلا هأقدر ، وكأن سنين العمر لا فاتت ولا عدت، ولا كأنى انكسرت..
وانا بقى دلوقتى لازم اسامح وعشان أولادى اعمل نفسى ولا فات من عمرى عشرين سنة.
طيب مين يدفع الحساب المتأخر واللى ما ينفعش حتى يدفع علشان فرق العملات عملة دلوقتى ما تسددش حساب زمان.
انت جيت متأخر أوى.....................
متأخر يجيى عشرين سنه.....................
وأنا دلوقتى وأنا أقوى من زمان وانت فى موقف أضعف ، مش هقدر غير انى اكمل بس هكمل ، لا تسألنى عن تضحية من بتوع زمان ولا حتى عن احساس ، مش قولتلك جيت متأخر..........................
لو الزوجة قالت كده وقررت بعد عشرين سنه انها مش من هنا.
يا ترى ده من حقها ، ويا ترى ولادها هيقبلو انها تعيش مرة فى حياتها بالطريقة اللى هى عايزاها ، ولا هيكونو انانين وهيشوفو انها لازم تكمل تضحية لحد الاخر ، وانها لازم تنسى اللى فات طيب ماهما كمان نسيو اللى فات وكلهم كانو مع بعض فى نفس المركب ، يبقى ياللا نعيش تانى ، الاب بيتغير للاحسن ليه لازم نكدر الحاضر بذكريات الماضى اللى كانت مؤلمة لينا كلنا.
وممكن يكون الاولاد ناسين انهم فى الاخر هيبقى لهم حياه تانيه ، لكن امهم هي دى حياتها اللى اصلا عدى منها كتير هل مش من حقها تكمل اللى فاضل بالطريقة اللى هى شايفة انها هتعوضها وهترضيها ،
ولا اللى اختار التضحية لازم يضحى لاخر قطرة فى دمه..............................

مش من هنا (1) كلية الطب....

واضح ان فى ضغوط أمريكية على كل الناس اللى بعتلهم لينك المدونة عشان كده ماقروهاش ولا علقو.
اناعارفة أمريكا عايزة تحطمنى ، انتو بتضحكو اشمعنى أنا يعنى اللى أمريكا مش هتدمرنى ،هى أمريكا واسرائيل هيهمدو ولا يرتاحلهم بال الا لما يخلصو على الدنيا كلها ويقعدو هما الاتنين على القهوة يقسمو العالم بينهم ، المهم بلاش كلام فى السياسة بدل ما نتمسك كلنا انشاء الله ونروح ورا الشمس، بس متهيألى ان ورا الشمس ما عدش فى مكان أصل كل الناس بقت هناك ، ياللا يمكن نلاقى حاجة ايجار جديد.
ونتيجة للتطنيش الواضح من كل الناس ، أنا هكمل بقى وخلاص أصل لو ما فضيتش الكلام اللى جوايا ممكن يجرالى حاجة وطبعا انا عارفة انكو ما تقدروش تعيشو من غيرى ، ومن هذا المزنق اقدر أقولكو عشان خاطركو انتو بس أنا هكمل ، اى والله عشان حاجات تعيش حاجات كتير لازم تموت على رأى خالتى شيرين اه يا ليل.
انا قفلت المرة اللى فاتت على انى كنت بقول للبت نونه صاحبتى انى مش من هنا.
أول حاجة خلتنى أحس كده انى حسيت انى مش من كلية الطب دى خالص، مع انى دخلتها بمزاجى بس انا دخلتها عشان هى احسن الوحشين ، يعنى مثلا انا مش بطيق الكميا عشان كده ما كنش ينفع ادخل صيدلة والنكتة بقى انى لقيت كل اللى فطب عامل مشترك بينهم كلهم انهم مش بيحبو الكميا، وطب الاسنان ماهو الا طب برضو وهفضل اذاكر طول عمرى بس فى مجال واحد.
الناس لما تسمعنى تقول يعنى هو ما فيش غير التلاتة دول ، لا طبعا فى، انا كان نفسى أوى ادخل اعلام بس انتو عارفين بقى ان فى واقع بيفرض نفسه ... هوانك لما بتكون وحيد بابا وماما يبقى لازم ينفذو فيك حلمهم هو انك تكون دكتور ، حتى لو دكتور فاشل..؟
ايوه حتى لو فاشل ، هما مالهمش دعوة ،المهم ابنى الدكتور راح ابنى الدكتور جه، ولو انت اي حاجة غير دكتور يبقى انت كدة خيبت املهم.
وطبعا لما بتبقى ان الوحيد ما ينفعش تبقى انانى ، لازم تبقى انت الامل وعمر ومنى وعلية وانتصار وست ابوها.
ايه بس الكلام الجامد اللى ان عمالة اقوله ده، ده الواحد مش سهل برضه.
طبعا بعد التسيح اللى انا سيحته لنفسى ده عمر ما حد هيجى يكشف عندى، انا اللى جبت ده كله لنفسى.
صدقونى والله انا لو ما حستش انى هبقى دكتوره بجد عمرى ما هعرض حياة حد للخطر ده عهد اخدته على نفسي ، وهكتفى انى اكون دكتوره فى وحده صحية ادى للناس ريفو اسبرين اى حاجة من اللى بتتسف دى ، يعنى ادى لواحد عنوان دكتور شاطر واقوله ابقى طمنى عليك لما تروح للدكتور ، يقوم قايم مدينى بالقلم ويقولى أمال انتى مين ، هقولة انا معهد فنى صحى قسم زرايع.
المهم لو أى حد حاسس انه مش من هناك ، قصدى يعنى حاسس انه مش بينتمى للكلية اللى هو فيها مهما كانت ، يجى ويفضفض ، يمكن اقدر اساعده ، ويمكن هو يساعدنى.
مستنية ردودكو ، والنبى والنبى ردو عليه ، ربنا يخليكو.
ان خلاص هشحت ............

انا ليه مش من هنا.............

طبعا أكيد كلنا حصل معانا موقف ان نكون فى مكان لأول مرة وما نعرفش فيه حاجة وبعدين يجى حد يسألك عن حاجة فيه ،
فتقوم طبعا عامل زى احمد حلمى ففيلم زكى شان لما قعد يقول للراجل انا مش من شرم ، انا مش من شرم ،
وطبعا لو الراجل صمم يسألك هتقوله مجازين ام..... اشتم اشتم علموك فى بلدك تشتم.
المهم خلونا فى موضوعنا ...................
مدونتى بتتكلم عن انك تكون حاسس انك مش من هنا حتى لو كنت فعلا من هنا،
يعنى مثلا حاسس انك مش بتنتمى للمكان اللى انت فيه او مش بتنتمى للناس اللى انت معاهم.
يمكن تكون حاسس ان الكلية اللى انت فيها مش مكانك المناسب او تكون حاسس انك مش منتمى لاصحابك أو اهلك أوبلدك أوحتى المدينة اللى انت عايش فيها.
دايما حاسس انك كنت المفروض تكون فى مكان تانى أو مع ناس تانين.
المدونة بتاعتى مش عايزة فيها تعليقات تقليدية زى حلو وبرافو وكلامك مؤثر،
لأ عايزة كل اللى يدخل يقولى أمتى حس اخر مرة انه مش من هنا.........؟
انا بقى هحكيلكو الحكاية بتاعت مش من هنا دى جت معايا أزاى......؟
انا كنت قاعدة فى يوم زى العسل الاسود لأ أقصدى الأبيض،كنت فى المدرج بحضر بعيد عنكو محاضرة بايو (كمياء حيوية يعنى)
اصل انا نسيت اقولكو انا فى تالته طب بشرى ،المهم الكلام ده كان السنة اللى فاتت ، ما قولتلكوش كنت قاعدة والمدرج كان فااااااااااااااضى
فيه كده زى ما تقولو بتاع يجى 800 طالب اللى قاعد على السلم واللى قاعد على اللى جنبه واللى قاعد على حجر الدكتورة اه ماهى كانت
دكتورة انما ايه كانت بتجيلنا محاضرة كل خميس من عروس البخر المتوسط، أصل هيه كانت خواجاية يا ولاد: الشعر الحرير والقوام الملفوف وفى عز شبابها حاجة كده ولا أم محمد هنيدى فى فيلم اسماعيلية رايح جاى...
المهم طبعا انا ربنا كان كارمنى وكنت قاعدة فى موقع استراتيجى ،أصل انا بنزل بدرى، وفى خضم الشرح العظيم والفهم اللى قطع قلبى،
ايون ، أصل الدكتورة دى مش عادية دى جبارة دى من كتر ما بتخاف علينا نموت من فرط الفهم ،، بتقول جملة وتريح قيمة ربع ساعة كده.
حتى تلاقينا مركزين معاها ، المصيبة بقى نفسى أسأل سؤال ال800 طالب دول وأنا معاهم بنحضر ليه اما هى مش عجبانا ........؟
المهم وأنا قاعدة بقى فى هذه الحالة من العلم الفياض كانت البت نونه صاحبتى قاعده جنبى بنواسى بعض يمكن نفهم............ وفجأة
فتحت فى العياط ، وقولتلها انا يا نونه حاسة أنى مش من هنا...........
طبعا انا قولت الكلمتين دول والبت نونه فتحت فى الضحك ايه يا اختى مش من هنا أمال منين من هناك،،،،،،،، وبعد شوية لما لاقتنى مش بهزر بدأت بقى اقولها انا ليه حاسة انى مش من هنا............
انشاء الله المرة الجاية أقولكو انا مش من هنا ليه
بس بجد مستنية تشجيعكو عشان أكمل يا ءاما والله هحس انى مش من هنا وهيبقى ذنبى فى رقابتكو.......